Cetuximab

ជាទូទៅ ឱសថនេះប្រើនៅក្នុងការព្យាបាលជំងឺដូចខាងក្រោម៖

・ជំងឺមហារីកនៅពោះវៀនធំ (Colorectal cancer) ដែលកំពុងវិវត្តឬរើឡើងវិញ ហើយមិនអាចព្យាបាលដោយវះកាត់ នៅក្នុងអ្នកជំងឺដែលមានលក្ខណៈសែនRAS wild-type។

・ជំងឺមហារីកនៅផ្នែកក្បាលនិងក។

ថ្នាំចាក់：

មនុស្សពេញវ័យ ប្រើ1សប្ដាហ៍ម្ដង។ លើកទី1 ប្រើក្នុងកម្រិត400mg/m² (ផ្ទៃក្រឡារាងកាយ) ដោយព្យួរសេរ៉ូមតាមសរសៃវ៉ែនរយៈពេល2ម៉ោង។ ចាប់ពីលើកទី2ទៅ ប្រើក្នុងកម្រិត 250mg/m² (ផ្ទៃក្រឡារាងកាយ) ដោយព្យួរសេរ៉ូមតាមសរសៃវ៉ែនរយៈពេល1ម៉ោង។ អាចបន្ថយកម្រិតប្រើប្រាស់ទៅតាមស្ថានភាពរបស់អ្នកជំងឺ។

・អ្នកដែលធ្លាប់មានរោគប្រតិកម្មធ្ងន់ធ្ងរជាមួយនឹងសារធាតុនៅក្នុងឱសថនេះ។

ផលរំខានរួមមាន មុនលើស្បែក ស្បែកស្ងួត កន្ទួលក្រហមលើស្បែក រាករូស រមាស់ស្បែក មិនឃ្លានអាហារ ចង់ក្អួត នឿយហត់ រលាកភ្នាសសើម រលាកជុំវិញក្រចក រលាកក្នុងមាត់(ពងបែកក្នុងមាត់) ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើមភ្លាមៗ កន្ទាលត្រអាក សម្ពាធឈាមចុះទាប បាត់បង់ស្មារតី (Infusion reaction)

- កន្ទួលក្រហមមានលក្ខណៈដូចមុនលើស្បែក ស្បែកស្ងួតឬរលាក (រោគសញ្ញាស្បែកធ្ងន់ធ្ងរ)

- ក្អកស្ងួត ពិបាកដកដង្ហើម ដង្ហក់ (ជំងឺរលាកសួតប្រភេទInterstitial pneumonia)

- ឈឺទ្រូង ពិបាកក្នុងទ្រូង(រោគសញ្ញានៃជំងឺត្បៀតឬស្ទះសរសៃឈាមក្នុងបេះដូង) (ជំងឺខ្សោយមុខងារបេះដូង)

- ឈឺពោះ រាករូស ខ្សោះជាតិទឹក (រាករូសធ្ងន់ធ្ងរ)

- ពិបាកដកដង្ហើម ពិបាកក្នុងទ្រូង ឈឺនៅពេលសង្កត់កំភួនជើង (ជំងឺស្ទះដោយសារកំណកឈាម)

- រលាកសួត រោគសញ្ញានៃSepsis (ជំងឺឆ្លងលក្ខណៈធ្ងន់ធ្ងរ)។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់ប៉ុណ្ណោះ។

・ស្ត្រីដែលអាចមានផ្ទៃពោះ គួរអនុវត្តវិធីពន្យារកំណើតដែលមានប្រសិទ្ធិភាព ក្នុងអំឡុងពេលប្រើប្រាស់ឱសថនេះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ការប្រើឱសថនេះត្រូវស្ថិតក្រោមការគ្រប់គ្រងម៉ត់ចត់ពីវេជ្ជបណ្ឌិតដែលមានបទពិសោធន៍ច្រើនក្នុងការព្យាបាលជំងឺមហារីកដោយគីមី។

・ត្រូវប្រុងប្រយ័ត្នជាពិសេសចំពោះផលរំខានinfusion reactionធ្ងន់ធ្ងររបស់ឱសថនេះ ព្រោះវាអាចមានគ្រោះថ្នាក់ដល់ជីវិតរបស់អ្នកជំងឺ។ រោគសញ្ញារួមមាន ទងសួតកន្ត្រាក់ កន្ទាលត្រអាក សម្ពាធឈាមចុះទាប បាត់បង់ស្មារតី ស្ទះសរសៃឈាមបេះដូង បេះដូងឈប់លោត ជាដើម។ រោគសញ្ញាទាំងនេះច្រើនកើតឡើងនៅពេលកំពុងប្រើប្រាស់ឱសថនេះជាលើកដំបូងឬនៅក្នុងអំឡុងពេល1ម៉ោងក្រោយចប់ការបញ្ចូលឱសថនេះ។ ប៉ុន្តែ វាក៏អាចកើតឡើងនៅប៉ុន្មានម៉ោងក្រោយចប់ការបញ្ចូលឱសថឬចាប់ពីការប្រើប្រាស់ជាលើកទី2តទៅដែរ ដូច្នេះ ប្រសិនបើឃើញមានរោគសញ្ញាខាងលើកើតឡើង ត្រូវបញ្ឈប់ការបញ្ចូលឱសថនេះភ្លាមនិងមិនត្រូវប្រើប្រាស់ឱសថនេះទៀតឡើយ។

・បន្ទាប់ពីបញ្ចូលឱសថនេះ ដើម្បីបង្ការឬកាត់បន្ថយរោគសញ្ញាស្បែកដែលអាចកើតឡើង អ្នកជំងឺគួរអនុវត្តការរក្សាអនាម័យស្បែកនិងព្យាយាមថែរក្សាសំណើមលើស្បែក។ មិនគួរងូតទឹកនឹងទឹកក្ដៅយូរនោះទេ ហើយត្រូវរក្សាសំណើមស្បែកអោយបានគ្រប់គ្រាន់ក្រោយងូតទឹក។ មិនគួរប្រើសាប៊ូដែលភ្ញោចស្បែកខ្លាំងឬដុសខាត់ស្បែកខ្លាំងៗនោះទេ។ គួរការពារស្បែកពីពន្លឺព្រះអាទិត្យនិងចៀសវាងប្រើសម្លៀកបំពាក់ឬស្បែកជើងដែលចង្អៀត។

ឱសថនេះជាអង់ទីករប្រភេទChimeric monoclonal antibodyដែលកើតពីបន្សំនៃផ្នែកថេរ(Constant region)របស់IgG1និងផ្នែកមិនថេរ(Variable region)របស់អង់ទីករនៅក្នុងកណ្ដុរ។ ឱសថនេះមានសកម្មភាពភ្ជាប់ជាពិសេសទៅនឹងEGFRនៅលើកោសិកាដែលមានវត្តមានEGFR ដើម្បីបង្អាក់ដំណើរការបង្កើនចំនួនកោសិកាទាំងនោះ។