Cimetidine

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ករណីថ្នាំលេប:

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - ដំបៅក្រពះ ដំបៅគល់ពោះវៀនតូច(Duodenal ulcer) ដំបៅនៅកន្លែងដេរភ្ជាប់ បណ្ដុំរោគសញ្ញាZollinger-Ellison ជំងឺរលាកបំពង់អាហារដោយសារការច្រាលអាស៊ីតក្រពះ(Reflux esophagitis) អាការៈហូរឈាមនៅប្រដាប់រំលាយអាហារផ្នែកខាងលើ(បណ្ដាលមកពី ជំងឺដំបៅប្រដាប់រំលាយអាហារ ជំងឺដំបៅដោយសារស្ត្រេសលក្ខណៈស្រួចស្រាវ ជំងឺរលាកក្រពះមានហូរឈាម) ។

      - បញ្ហាភ្នាសក្រពះ(រលាត់ ហូរឈាម ក្រហម ហើម) ដែលកើតមាននៅក្នុងជំងឺរលាកក្រពះស្រួចស្រាវ ឬ ដំណាក់កាលស្រួចស្រាវនៃជំងឺរលាកក្រពះរ៉ាំរ៉ៃ។

      ករណីថ្នាំចាក់:

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - ព្យាបាលអាការៈហូរឈាមនៅប្រដាប់រំលាយអាហារផ្នែកខាងលើ(បណ្ដាលមកពី ជំងឺដំបៅប្រដាប់រំលាយអាហារ ជំងឺដំបៅដោយសារស្ត្រេសលក្ខណៈស្រួចស្រាវ ជំងឺរលាកក្រពះមានហូរឈាម)

      - ទប់ស្កាត់អាការៈហូរឈាមនៅប្រដាប់រំលាយអាហារផ្នែកខាងលើដែលបណ្ដាលមកពីការវះកាត់ឬរបួសនៅលើរាងកាយ(ក្រោយការវះកាត់លក្ខណៈធំ ជំងឺប៉ះពាល់សរសៃឈាមខួរក្បាល របួសក្បាលពីខាងក្រៅ មុខងារសរីរាង្គច្រើនចុះខ្សោយ រលាកភ្លើងកម្រិតធ្ងន់ជាដើម ដែលត្រូវការគ្រប់គ្រងស្ថានភាពរាងកាយដិតដល់(ICU))។

      - ប្រើនៅមុនពេលអនុវត្តការសណ្ដំ។

    • កម្រិតប្រើប្រាស់

      ករណីថ្នាំលេប:

      ・ករណីព្យាបាលជំងឺដំបៅក្រពះ ដំបៅគល់ពោះវៀនតូច(Duodenal ulcer):

      មនុស្សពេញវ័យ:លេប1ថ្ងៃ800mg បែងចែកជា2ដងក្នុង1ថ្ងៃ ក្រោយអាហារពេលព្រឹកនិងមុនពេលចូលគេង។ អាចប្រើ1ថ្ងៃ800mgដោយបែងចែកជា4ដងក្នុង1ថ្ងៃ(ក្រោយបរិភោគអាហារនិងមុនពេលចូលគេង) ឬ ប្រើ1ថ្ងៃ1ដង800mg នៅមុនពេលចូលគេងក៏បានដែរ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

      ・ករណីព្យាបាលដំបៅនៅកន្លែងដេរភ្ជាប់ បណ្ដុំរោគសញ្ញាZollinger-Ellison ជំងឺរលាកបំពង់អាហារដោយសារការច្រាលអាស៊ីតក្រពះ(Reflux esophagitis) អាការៈហូរឈាមនៅប្រដាប់រំលាយអាហារផ្នែកខាងលើ(បណ្ដាលមកពី ជំងឺដំបៅប្រដាប់រំលាយអាហារ ជំងឺដំបៅដោយសារស្ត្រេសលក្ខណៈស្រួចស្រាវ ជំងឺរលាកក្រពះមានហូរឈាម):

      មនុស្សពេញវ័យ:លេប1ថ្ងៃ800mg បែងចែកជា2ដងក្នុង1ថ្ងៃ ក្រោយអាហារពេលព្រឹកនិងមុនពេលចូលគេង។ អាចប្រើ1ថ្ងៃ800mgដោយបែងចែកជា4ដងក្នុង1ថ្ងៃ(ក្រោយបរិភោគអាហារនិងមុនពេលចូលគេង) ក៏បានដែរ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

      ・ករណីព្យាបាលបញ្ហាភ្នាសក្រពះ(រលាត់ ហូរឈាម ក្រហម ហើម) ដែលកើតមាននៅក្នុងជំងឺរលាកក្រពះស្រួចស្រាវ ឬ ដំណាក់កាលស្រួចស្រាវនៃជំងឺរលាកក្រពះរ៉ាំរ៉ៃ:

      មនុស្សពេញវ័យ:លេប1ថ្ងៃ400mg បែងចែកជា2ដងក្នុង1ថ្ងៃ ក្រោយអាហារពេលព្រឹកនិងមុនពេលចូលគេង។ អាចប្រើ1ថ្ងៃ1ដង400mg នៅមុនពេលចូលគេងក៏បានដែរ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

      ករណីថ្នាំចាក់:

      ・ករណីព្យាបាលអាការៈហូរឈាមនៅប្រដាប់រំលាយអាហារផ្នែកខាងលើ(បណ្ដាលមកពី ជំងឺដំបៅប្រដាប់រំលាយអាហារ ជំងឺដំបៅដោយសារស្ត្រេសលក្ខណៈស្រួចស្រាវ ជំងឺរលាកក្រពះមានហូរឈាម) និង ករណីទប់ស្កាត់អាការៈហូរឈាមនៅប្រដាប់រំលាយអាហារផ្នែកខាងលើដែលបណ្ដាលមកពីការវះកាត់ឬរបួសនៅលើរាងកាយ(ក្រោយការវះកាត់លក្ខណៈធំ ជំងឺប៉ះពាល់សរសៃឈាមខួរក្បាល របួសក្បាលពីខាងក្រៅ មុខងារសរីរាង្គច្រើនចុះខ្សោយ រលាកភ្លើងកម្រិតធ្ងន់ជាដើម ដែលត្រូវការគ្រប់គ្រងស្ថានភាពរាងកាយដិតដល់(ICU)):

      មនុស្សពេញវ័យ:ប្រើ1ដង200mg លាយនៅក្នុងសេរ៉ូមប្រៃឬសេរ៉ូមគ្លុយកូសបរិមាណ20mL 1ថ្ងៃ4ដង(ដោយទុកគម្លាតរយៈពេល6ម៉ោង) ចាក់តាមសរសៃវ៉ែនយឺតៗ។ ឬក៏អាចលាយនៅក្នុងសេរ៉ូមដើម្បីព្យួរសេរ៉ូមតាមសរសៃវ៉ែនក៏បានដែរ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។ ជាទូទៅ គេតាមដានប្រសិទ្ធិភាពឱសថក្នុងអំឡុងពេល1សប្ដាហ៍ ហើយនៅពេលអ្នកជំងឺអាចប្រើថ្នាំលេបបានហើយ គេនឹងប្ដូរពីការប្រើថ្នាំចាក់ទៅជាថ្នាំលេបវិញ។ ចំពោះករណីទប់ស្កាត់អាការៈហូរឈាមនៅប្រដាប់រំលាយអាហារផ្នែកខាងលើនៅក្រោយការវះកាត់លក្ខណៈធំ ជាទូទៅ គេប្រើឱសថនេះរយៈពេល3ថ្ងៃ ហើយចំពោះអាការៈហូរឈាមដោយសារជំងឺឬរបួសផ្សេងៗ ជាទូទៅ គេប្រើឱសថនេះរយៈពេល7ថ្ងៃ។

      ・ករណីប្រើនៅមុនពេលអនុវត្តការសណ្ដំ:

      មនុស្សពេញវ័យ:ប្រើ1ដង200mg ចាក់ក្នុងសាច់ដុំ នៅ1ម៉ោងមុនចាប់ផ្ដើមសណ្ដំ។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

    • ផលរំខាន

      ផលរំខានរួមមាន ទល់លាមក ឡើងកន្ទួលក្រហម ឡើងដោះ ចេញទឹកដោះ ធ្លាក់ស បញ្ហាប្រដាប់ភេទបុរស ឈឺឬស្ពឹកដៃជើង ពិបាកធ្វើចលនា។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ទឹកមុខស្លេកសាំ្លង ពិបាកដកដង្ហើម បែកញើសទាំងត្រជាក់(រោគប្រតិកម្មធ្ងន់ធ្ងរ)

      - រួយខ្លួន ក្ដៅខ្លួន ឈាមច្រមុះ ហូរឈាមក្រោមស្បែក ឈឺបំពង់ក ឈឺក្បាល ឈឺសាច់ដុំ អាការៈខ្វះឈាម (រោគសញ្ញានៃការថយចុះគ្រាប់ឈាមស គ្រាប់ឈាមក្រហម ប្លាកែត)

      - ចង់ក្អួត ក្អួតចង្អោរ អស់កម្លាំង បាត់បង់ចំណង់អាហារ ភ្នែកនិងស្បែកប្រែពណ៌លឿង (មុខងារថ្លើមមានបញ្ហា ខាន់លឿង)

      - ស្មារតីចុះខ្សោយ ពិបាកផ្ដុំអារម្មណ៍គិត ពិបាកសម្រេចចិត្ត (បាត់បង់ស្មារតី ប្រកាច់(Myoclonus))

      - ក្តៅខ្លួន អស់កម្លាំង កន្ទួលក្រហមនៅលើស្បែក ភ្នែកនិងក្នុងមាត់ (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome) ជំងឺស្លាប់កោសិកាស្បែក(TEN))

      - បរិមាណទឹកនោមថយចុះ ខ្សត់ទឹកនោម ក្ដៅខ្លួន (មុខងារតម្រងនោមចុះខ្សោយស្រួចស្រាវ ជំងឺរលាកតម្រងនោមប្រភេទInterstitial nephritis)។

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថប្រឆាំងកំណកឈាមWarfarin, ឱសថប្រភេទBenzodiazepines(Diazepam, Triazolam, Midazolam ជាដើម), ឱសថព្យាបាលជំងឺប្រកាច់(Phenytoin, Carbamazepine ជាដើម), ឱសថព្យាបាលជំងឺបាក់ទឹកចិត្ត(Imipramine, Paroxetine), ឱសថប្រភេទβblocker(Propranolol, Metoprolol, Labetalol ជាដើម), ឱសថប្រភេទCalcium antagonist(Nifedipine ជាដើម), ឱសថព្យាបាលជំងឺទាក់ទងនឹងចង្វាក់បេះដូង(Lidocaine ជាដើម), ឱសថប្រភេទXanthine(Theophylline, Aminophylline ជាដើម), ឱសថProcainamide, ឱសថErythromycin - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・ចំនួនដងនៃការប្រើប្រាស់អាចប្រែប្រួលទៅតាមប្រភេទឱសថនីមួយ ហើយកម្រិតប្រើប្រាស់ក៏អាចប្រែប្រួលទៅតាមជំងឺនីមួយៗផងដែរ។

    • សកម្មភាពឱសថ

      ឱសថនេះមានសកម្មភាពបង្អាក់ដំណើរការនៃការភ្ញោចគ្រឿងទទួលហ៊ីស្តាមីនH2 (H2 receptors)ដែលស្ថិតនៅលើភ្នាសនៅក្នុងក្រពះ ដើម្បីទប់ស្កាត់ការបញ្ចេញសារធាតុអាស៊ីតក្រពះច្រើនហួសហេតុ។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp