Phenobarbital

ផលិតផល: 

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ករណីថ្នាំលេប:

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - អាការៈគេងមិនលក់

      - អារម្មណ៍មិនស្ងប់ឬភ័យ

      - អាការៈកន្ត្រាក់សាច់ដុំដែលកើតមាននៅក្នុងជំងឺប្រកាច់ (រួមមាន ប្រភេទTonic-clonic seizures និង ប្រភេទFocal seizure)

      - អាការៈចង់ក្អួតជាដើមដែលបណ្ដាលមកពីការប៉ះពាល់ប្រព័ន្ធប្រសាទអូតូណូមិច(Autonomic seizure)

      - ជំងឺឆ្កួតជ្រូកដែលបណ្ដាលមកពីការប៉ះពាល់សរសៃប្រសាទ(Psychomotor seizure)។

      ករណីថ្នាំចាក់:

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - អារម្មណ៍មិនស្ងប់ឬភ័យ (ករណីចាំបាច់បន្ទាន់ប៉ុណ្ណោះ)

      - អាការៈកន្ត្រាក់សាច់ដុំដែលកើតមាននៅក្នុងជំងឺប្រកាច់ (រួមមាន ប្រភេទTonic-clonic seizures និង ប្រភេទFocal seizure)

      - អាការៈចង់ក្អួតជាដើមដែលបណ្ដាលមកពីការប៉ះពាល់ប្រព័ន្ធប្រសាទអូតូណូមិច(Autonomic seizure)

      - ជំងឺឆ្កួតជ្រូកដែលបណ្ដាលមកពីការប៉ះពាល់សរសៃប្រសាទ(Psychomotor seizure)។

    • កម្រិតប្រើប្រាស់

      ករណីថ្នាំលេប:

      មនុស្សពេញវ័យ:លេប1ថ្ងៃ30~200mg បែងចែកជា 1~4ដងក្នុង1ថ្ងៃ។ ករណីបំបាត់អាការៈគេងមិនលក់ លេប1ដង30~200mg នៅមុនពេលចូលគេង។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

      ករណីថ្នាំចាក់:

      មនុស្សពេញវ័យ:ប្រើ1ដង 50~200mg 1ថ្ងៃ 1~2ដង ចាក់ក្រោមស្បែកឬចាក់ក្នុងសាច់ដុំ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះឬឱសថប្រភេទBarbiturate។

      ・អ្នកដែលមានជំងឺប៉ូហ្វីរីនប្រភេទAcute intermittent porphyria។

      ・អ្នកដែលកំពុងប្រើប្រាស់ឱសថដូចខាងក្រោម៖ Voriconazole, Tadalafil, Rilpivirine, Asunaprevir, Daclatasvir, Vaniprevir, Macitentan។

      ・អ្នកដែលកំពុងប្រើប្រាស់ឱសថដូចខាងក្រោម៖ Disulfiram, Cyanamide, Procarbazine hydrochloride (ករណីជាប្រភេទថ្នាំទឹកដែលមានផ្ទុកជាតិអាលកុល)។

    • ផលរំខាន

      ផលរំខានរួមមាន ងងុយគេង វិលមុខ ឡើងកន្ទួលក្រហម ។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ក្តៅខ្លួន ស្នាមក្រហមឬពងទឹកលើស្បែក ភ្នែកក្រហម (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome ឬ StevensJohnson syndrome) ជំងឺស្លាប់កោសិកាស្បែក(TEN))

      - ឡើងកន្ទួលក្រហម ក្ដៅខ្លួន ហើមកូនកណ្ដុរ (បណ្ដុំរោគសញ្ញានៃរោគប្រតិកម្ម)

      - ក្រោយពេលបន្ថយបរិមាណឬឈប់ប្រើប្រាស់ឱសថ មានអារម្មណ៍មិនស្ងប់ឬគេងមិនលក់ ញ័រដៃជើង រវើរវាយ សាច់ដុំកន្ត្រាក់ (អាការៈញៀន)

      - ឈឺបំពង់ក ក្ដៅខ្លួន ឈាមច្រមុះ ឈាមតាមអញ្ចាញធ្មេញ (រោគសញ្ញានៃការថយចុះចំនួនប្លាកែត ជាដើម)

      - អស់កម្លាំង បាត់បង់ចំណង់អាហារ ភ្នែកនិងស្បេកប្រែពណ៌លឿង (មុខងារថ្លើមមានបញ្ហា)

      - ពិបាកដកដង្ហើម (ផលប៉ះពាល់លើប្រព័ន្ធគ្រប់គ្រងដំណកដង្ហើម)។

    • អន្តរប្រតិកម្ម

      ・ឱសថដូចខាងក្រោម៖ Voriconazole, Tadalafil, Rilpivirine, Asunaprevir, Daclatasvir, Vaniprevir, Macitentan - អាចធ្វើអោយកំហាប់ក្នុងឈាមនៃឱសថទាំងនេះថយចុះ។ ដូច្នេះ ហាមប្រើរួមគ្នា។

      ・ឱសថដូចខាងក្រោម៖ Disulfiram, Cyanamide, Procarbazine hydrochloride - អាចមានប្រតិកម្មជាមួយជាតិអាល់កុល បង្កជាអាការៈចង់ក្អួត សម្ពាធឈាមចុះទាប មុខក្រហម វិលមុខ ជាដើម។ ដូច្នេះ ហាមប្រើរួមគ្នា ក្នុងករណីជាប្រភេទថ្នាំទឹកដែលមានផ្ទុកជាតិអាលកុល។

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថដែលទប់ស្កាត់ប្រព័ន្ធប្រសាទកណ្ដាល (ឱសថប្រភេទPhenothiazine, ឱសថប្រភេទBarbiturate, Tranquilizer, Topiramate ជាដើម), ឱសថប្រឆាំងហ៊ីស្តាមីន(ឱសថDiphenhydramine ជាដើម), ឱសថប្រភេទMonoamine oxidase inhibitors, គ្រឿងស្រវឹង - អាចធ្វើអោយសកម្មភាពនៃឱសថទាំងសងខាងកើនឡើង។

      ・ឱសថព្យាបាលជំងឺបាក់ទឹកចិត្តប្រភេទTricyclic antidepressants (ឱសថImipramine ជាដើម) និង ប្រភេទTetracyclic antidepressants (ឱសថMaprotiline ជាដើម) - អាចធ្វើអោយសកម្មភាពទប់ស្កាត់ប្រព័ន្ធប្រសាទកណ្ដាលកើនឡើង និង ធ្វើអោយកំហាប់ក្នុងឈាមនៃឱសថទាំងនេះថយចុះ។

      ・ឱសថMethylphenidate - អាចធ្វើអោយកំហាប់ក្នុងឈាមនៃPhenobarbitalកើនឡើង។

      ・ឱសថValproic acid, ឱសថStiripentol, ឱសថClobazam - អាចធ្វើអោយកំហាប់ក្នុងឈាមនៃPhenobarbitalកើនឡើង។

      ・ឱសថSofosbuvir, ឱសថIrinotecan - អាចធ្វើអោយកំហាប់ក្នុងឈាមនៃឱសថទាំងនេះថយចុះ។

      ・ឱសថដែលទទួលប្រតិកម្មពីអង់ស៊ីមCYP3A4ជាចម្បង (ឱសថAzelnidipine, Iguratimod, Imatinib, Indinavir, Carbamazepine, Saquinavir, Ciclosporin, Zonisamide, Tacrolimus, Felodipine, Verapamil, Montelukast, ឱសថស្តេរ៉ូអ៊ីត (Dexamethasone ជាដើម), ឱសថអរម៉ូនស្ត្រី(Norgestrel-ethinyl estradiol ជាដើម), ឱសថទប់ស្កាត់អង់ស៊ីមPDE5(Tadalafil, Sildenafil, Vardenafil ជាដើម)), ឱសថAminophylline hydrate, ឱសថChloramphenicol, ឱសថTheophylline, ឱសថTropisetron, ឱសថParoxetine, ឱសថFlecainide, ឱសថLamotrigine, ឱសថDeferasirox, ឱសថRufinamide, ឱសថAlbendazole - អាចធ្វើអោយកំហាប់ក្នុងឈាម ក៏ដូចជាប្រសិទ្ធិភាពនៃឱសថទាំងនេះថយចុះ។

      ・ឱសថDoxycycline - អាចធ្វើអោយឱសថDoxycyclineឆាប់បាត់បង់ពីក្នុងប្រព័ន្ធឈាមនៃរាងកាយ។

      ・ឱសថWarfarin - អាចធ្វើអោយសកម្មភាពប្រឆាំងកំណកឈាមថយចុះ។

      ・ឱសថបញ្ចុះទឹកនោម (ប្រភេទThiazide ជាដើម) - អាចធ្វើអោយកើតមានផលរំខានងងឹតមុខពេលក្រោកឈរ។

      ・ឱសថAcetazolamide - អាចធ្វើអោយងាយកើតជំងឺឆ្អឹងទន់។

      ・ឱសថAcetaminophen - អាចធ្វើអោយផលរំខានប៉ះពាល់ថ្លើមពីAcetaminophenងាយកើតឡើង។

      ・អាហារបំប៉នដែលមានផ្ទុកសារធាតុSt.John's Wort - អាចធ្វើអោយកំហាប់ក្នុងឈាមនៃPhenobarbitalថយចុះ។

      ・ឱសថCefmenoxime hydrochloride, ឱសថMetronidazole - អាចមានប្រតិកម្មជាមួយនឹងជាតិអាល់កុល បង្កជាផលរំខានផ្សេងៗ (ករណីជាប្រភេទថ្នាំទឹកដែលមានផ្ទុកជាតិអាលកុល)។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・ករណីប្រើបំបាត់អាការៈគេងមិនលក់ គួរប្រើឱសថនេះនៅមុនពេលចូលគេងភ្លាម។ ម្យ៉ាងទៀត មិនត្រូវប្រើប្រាស់ឱសថនេះទេ ករណីត្រូវក្រោកពាក់កណ្ដាលទីក្នុងអំឡុងពេលគេងដើម្បីធ្វើការងារផ្សេងៗ។

      ・នៅក្នុងអំឡុងពេលប្រើប្រាស់ឱសថនេះ អាចធ្វើអោយកើតមានអាការៈពិបាកផ្ដុំអារម្មណ៍ ងាយធ្វេសប្រហែស ជាដើម ដូច្នេះ គួរចៀសវាងការបើកបររថយន្តឬបញ្ជាម៉ាស៊ីនដែលមានគ្រោះថ្នាក់។

      ・គ្រឿងស្រវឹងអាចធ្វើអោយផលរំខានរបស់ឱសថកើនឡើង ដូច្នេះ គួរចៀសវាងការពិសាគ្រឿងស្រវឹងនៅក្នុងអំឡុងពេលប្រើប្រាស់ឱសថនេះ។

    • សកម្មភាពឱសថ

      ឱសថនេះមានសកម្មភាពភ្ជាប់ទៅនឹងផ្នែកសម្រាប់ភ្ជាប់ជាមួយសារធាតុប្រភេទBarbiturates ដែលជាផ្នែកមួយនៃគ្រឿងទទួលហ្កាបា(GABA receptor)។ ការភ្ជាប់ជាមួយផ្នែកនេះ ធ្វើអោយឱសថនេះអាចភ្ជាប់ទៅនឹងគ្រឿងទទួលហ្កាបាបានកាន់តែស្និទ្ធដើម្បីភ្ញោចគ្រឿងទទួលនេះ ធ្វើអោយប្រព័ន្ធសរសៃប្រសាទដែលបញ្ជូនសញ្ញាដោយសារធាតុហ្កាបាមានសកម្មភាពឡើង។ ជាលទ្ធផល សកម្មភាពក្នុងខួរក្បាលត្រូវបានកាត់បន្ថយ ហើយអាការៈនៃអារម្មណ៍មិនស្ងប់ គេងមិនលក់ ឬ សាច់ដុំកន្ត្រាក់ក៏អាចធូរស្បើយ។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp