Deferasirox

ជាទូទៅ ឱសថនេះប្រើនៅក្នុងការព្យាបាលរោគសញ្ញានៃការកើនឡើងជាតិដែកហួសកម្រិតលក្ខណៈរ៉ាំរ៉ៃ ដែលបណ្ដាលមកពីការបញ្ចូលឈាម (ករណីមិនអាចព្យាបាលដោយប្រើIron Chelateប្រភេទចាក់បាន)។

ថ្នាំលេប：

ជាទូទៅ ប្រើក្នុងកម្រិត1ថ្ងៃ1ដង20mg/kg លាយជាមួយទឹក100mLឬច្រើនជាងនេះ រួចពិសារនៅពេលពោះទទេ។ អាចបង្កើនឬបន្ថយកម្រិតប្រើប្រាស់ទៅតាមស្ថានភាពរបស់អ្នកជំងឺ ប៉ុន្តែ កម្រិតអតិបរមាប្រើក្នុង1ថ្ងៃគឺ30mg/kg។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលមានបញ្ហាតម្រងនោមកម្រិតធ្ងន់ធ្ងរ។

・អ្នកដែលមានជំងឺMyelodysplastic syndromes(MDS)ហានិភ័យខ្ពស់ និង កំពុងស្ថិតក្នុងស្ថានភាពរាងកាយមិនល្អ។

・អ្នកដែលមានជំងឺមហារីក និង កំពុងស្ថិតក្នុងស្ថានភាពរាងកាយមិនល្អ។

ផលរំខានរួមមាន រាករូស ចង់ក្អួត ក្អួត ឈឺពោះ រំលាយអាហារមិនសូវល្អ ឡើងកន្ទួលក្រហម ។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- កន្ទាលត្រអាក ពិបាកដកដង្ហើម ហើមភ្នែកនិងជុំវិញបបូរមាត់ (រោគប្រតិកម្មធ្ងន់ធ្ងរ)

- បរិមាណទឹកនោមថយចុះ ហើម ឈឺក្បាល (មុខងារតម្រងនោមចុះខ្សោយលក្ខណៈស្រួចស្រាវ)

- បាត់បង់ចំណង់អាហារ អស់កម្លាំង ភ្នែកនិងស្បែកប្រែពណ៌លឿង (រលាកថ្លើម មុខងារថ្លើមចុះខ្សោយ)

- ចង់ក្អួត ឈឺពោះខ្លាំង លាមកពណ៌ខ្មៅ (ដំបៅក្រពះពោះវៀន ហូរឈាមក្នុងក្រពះពោះវៀន ធ្លាយក្រពះពោះវៀន)

- ក្ដៅខ្លួន ឡើងកន្ទួលក្រហមឬពងទឹកនៅលើស្បេក ភ្នែកក្រហម រលាត់ស្បែកនៅបបូរមាត់និងក្នុងមាត់ (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome ឬ StevensJohnson syndrome) ជំងឺErythema multiforme)

- ស្ដាប់មិនសូវលឺ ស្រវាំងភ្នែក មើលមិនច្បាស់ (ប៉ះពាល់សមត្ថភាពស្ដាប់ រលាកសរសៃប្រសាទភ្នែក ភ្នែកឡើងបាយដំណាក់កាលដំបូង)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថបន្សាបជាតិអាស៊ីតក្នុងក្រពះដែលមានផ្ទុកអាលុយមីញ៉ូម - អាចធ្វើអោយប្រសិទ្ធិភាពនៃឱសថទាំងសងខាងថយចុះ។

・ឱសថដែលរងប្រតិកម្មពីអង់ស៊ីមCYP3A4 (Ciclosporin, Simvastatin, Midazolam, ឱសថពន្យារកំណើត ជាដើម) - អាចធ្វើអោយប្រសិទ្ធិភាពនៃឱសថទាំងនេះថយចុះ។

・ឱសថRepaglinide, ឱសថTreprostinil - អាចធ្វើអោយកំហាប់ក្នុងឈាមនៃឱសថទាំងនេះកើនឡើង បង្កជាផលរំខានផ្សេងៗ។

・ឱសថTheophylline - អាចធ្វើអោយកំហាប់ក្នុងឈាមនៃTheophyllinកើនឡើង បង្កជាផលរំខានផ្សេងៗ។

・ឱសថដែលបង្កើនសកម្មភាពអង់ស៊ីមUGTខ្លាំងក្លា (Rifampicin, Phenytoin, Phenobarbital, Ritonavir ជាដើម) - អាចធ្វើអោយកំហាប់ក្នុងឈាមនៃឱសថDeferasiroxថយចុះ។

・ឱសថដែលអាចធ្វើអោយកើតមានដំបៅក្រពះពោះវៀន (ឱសថបំបាត់ការឈឺចាប់ប្រភេទNSAIDs, ឱសថស្តេរ៉ូអ៊ីត, ឱសថប្រភេទBisphosphonate(ថ្នាំលេប) ជាដើម) - អាចធ្វើអោយកើតមានផលរំខានបង្កជាដំបៅឬការហូរឈាមក្នុងក្រពះពោះវៀន។

・ឱសថប្រឆាំងកំណកឈាម - អាចធ្វើអោយងាយកើតមានអាការៈហូរឈាមក្នុងក្រពះពោះវៀន។

・ឱសថColestyramine - អាចធ្វើអោយកំហាប់ក្នុងឈាមនៃDeferasiroxថយចុះ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・នៅក្នុងការប្រើប្រាស់ឱសថនេះ ត្រូវប្រុងប្រយ័ត្នជាពិសេសចំពោះផលរំខានប៉ះពាល់ដល់មុខងារថ្លើម មុខងារតម្រងនោម និង ការហូរឈាមនៅក្រពះពោះវៀន ព្រោះវាអាចមានគ្រោះថ្នាក់ដល់អាយុជីវិតរបស់អ្នកជំងឺ។ ដូច្នេះ ត្រូវពិនិត្យតាមដានកម្រិតTransaminaseនិងCreatinineនៅក្នុងឈាមជាដើមអោយបានទៀងទាត់ ជាពិសេសចំពោះអ្នកជំងឺជាមនុស្សចាស់ ឬ អ្នកដែលមានបញ្ហាថ្លើមឬតម្រងនោម ឬ អ្នកដែលមានចំនួនប្លាកែតតិចជាង50,000/mm3 ឬ អ្នកដែលមានជំងឺMyelodysplastic syndromes(MDS)ហានិភ័យខ្ពស់។

・នៅក្នុងអំឡុងពេលប្រើប្រាស់ឱសថនេះ អាចនឹងមានអាការៈស្រវាំងភ្នែក ឬ ស្ដាប់មិនសូវលឺ ដូច្នេះ គួរប្រុងប្រយ័ត្នជាពិសេសនៅពេលបើកបររថយន្តឬបញ្ជាម៉ាស៊ីនដែលមានគ្រោះថ្នាក់។

ឱសថនេះជាប្រភេទIron Chelate ដែលមានសកម្មភាពភ្ជាប់ទៅនឹងអ៊ីយ៉ុងដែក ដើម្បីបញ្ចេញជាតិដែកដែលផ្ដុំច្រើនហួសកម្រិតនៅក្នុងរាងកាយចេញទៅតាមទឹកប្រមាត់។