Enoxaparin sodium

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការបង្ការជំងឺស្ទះកំណកឈាមក្នុងសរសៃឈាមវ៉ែន ចំពោះអ្នកជំងឺដូចខាងក្រោម៖

      - អ្នកជំងឺដែលទទួលការវះកាត់ឆ្អឹងនៃអវៈយវៈផ្នែកខាងក្រោម រួមមាន ការវះកាត់ផ្លាស់ប្ដូរសន្លាក់ត្រគាក ការវះកាត់ផ្លាស់ប្ដូរសន្លាក់ជង្គង់ ការវះកាត់ឆ្អឹងបាក់នៅសន្លាក់ត្រគាក។

      - អ្នកជំងឺដែលទទួលការវះកាត់ផ្នែកពោះដែលមានហានិភ័យខ្ពស់ក្នុងការកើតមានការស្ទះកំណកឈាមក្នុងសរសៃឈាមវ៉ែន។

    • កម្រិតប្រើប្រាស់

      ថ្នាំចាក់:

      ប្រើ1ដង 2000 IU 1ថ្ងៃ2ដងរៀងរាល់12ម៉ោង ដោយចាក់ក្រោមស្បែក។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថប្រភេទHeparin។

      ・អ្នកដែលកំពុងមានអាការៈហូរឈាម (ហូរឈាមនៅក្នុងក្បាល ឬ ហូរឈាមនៅសរីរាង្គសំខាន់ៗផ្សេងទៀត)។

      ・អ្នកដែលមានជំងឺរលាកភ្នាសខាងក្នុងនៃបេះដូងដោយសារបាក់តេរី(Bacterial Endocarditis)លក្ខណៈស្រួចស្រាវ។

      ・អ្នកដែលមានបញ្ហាតម្រងនោមធ្ងន់ធ្ងរ។

      ・អ្នកដែលធ្លាប់មានជំងឺថយចុះចំនួនប្លាកែតដោយសារសារធាតុហិប៉ារីន(Heparin-induced thrombocytopenia, HIT)។

    • ផលរំខាន

      ផលរំខានរួមមាន កើតមានដុំឈាម អាការៈហូរឈាម អាការៈខ្វះឈាម ឈឺក្បាល វិលមុខ ឡើងកន្ទួលក្រហម រមាស់ស្បែក ទល់លាមក ឈឺនៅតាមដៃជើង។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ទឹកមុខខៀវស្វាយ បែកញើសទាំងត្រជាក់ ងងឹតមុខ (រោគប្រតិកម្មធ្ងន់ធ្ងរ)

      - បាត់បង់ចំណង់អាហារ អស់កម្លាំង ភ្នែកនិងស្បែកប្រែពណ៌លឿង (មុខងារថ្លើមចុះខ្សោយ ខាន់លឿង)

      - ឈាមច្រមុះ ឈាមតាមអញ្ចាញធ្មេញ ឈាមក្រោមស្បែកនៅតាមដៃជើង (រោគសញ្ញានៃការថយចុះចំនួនប្លាកែត ការហូរឈាម ការកើតមានដុំឈាម)។

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថប្រឆាំងកំណកឈាម(Heparin, Warfarin ជាដើម), ឱសថដែលទប់ស្កាត់ប្រតិកម្មនៃការផ្ដុំប្លាកែត(Dipyridamole, Ticlopidine ជាដើម), ឱសថប្រភេទSalicylic acid(Aspirin ជាដើម), ឱសថDextran 40, ឱសថរំលាយកំណកឈាម(Urokinase, t-PA ជាដើម) - អាចធ្វើអោយហានិភ័យនៃការហូរឈាមកើនឡើង។

      ・ឱសថបញ្ចុះកម្ដៅនិងបំបាត់ការឈឺចាប់ប្រភេទNSAIDs(Loxoprofen, Diclofenac ជាដើម) - អាចធ្វើអោយហានិភ័យនៃការហូរឈាមកើនឡើង។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・ជាគោលការណ៍ គួរចាប់ផើ្ដមប្រើប្រាស់ឱសថនេះក្រោយការវះកាត់រយៈពេល24ទៅ36ម៉ោង បន្ទាប់ពីពិនិត្យឃើញថាមិនមានការហូរឈាមពីមុខរបួសវះកាត់ ជាដើម។

      ・នៅក្នុងអំឡុងពេលប្រើប្រាស់ឱសថនេះ ការពិនិត្យសមត្ថភាពកំណកឈាមតាមរយៈការវាស់រយៈពេលACT, រយៈពេលPT, រយៈពេលaPTT ជាដើម អាចនឹងមិនបង្ហាញភាពសុក្រិតនោះទេ ដូច្នេះ គួរកត់សម្គាល់ទៅលើរោគសញ្ញានៃការហូរឈាមផ្សេងៗដែលកើតមាននៅលើអ្នកជំងឺជាជាងលទ្ធផលនៃការពិនិត្យទាំងនេះ។

      ・នៅពេលប្រើប្រាស់ឱសថនេះរួមជាមួយការចាក់បញ្ចូលថ្នាំស្ពឹកតាមឆ្អឹងខ្នងឬខាងក្រៅភ្នាសរឹង ត្រូវប្រុងប្រយ័ត្នជាពិសេសចំពោះការកើតមានដុំឈាមដែលសង្កត់ទៅលើសរសៃប្រសាទធ្វើអោយកើតមានអាការៈស្ពឹករយៈពេលវែងឬជារៀងរហូត។ សូមពិនិត្យមើលព័ត៌មានបន្ថែមដើម្បីចៀសវាងការកើតមានបញ្ហាធ្ងន់ធ្ងរនេះ។

    • សកម្មភាពឱសថ

      ឱសថនេះមានប្រសិទ្ធិភាពទប់ស្កាត់សកម្មភាពនៃកត្តាកំណកឈាមXaនិងIIa ដើម្បីបង្អាក់ដំណើរការនៃការកកើតកំណកឈាមខុសប្រក្រតីដែលអាចបង្កជាជំងឺផ្សេងៗ។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp