Methylprednisolone sodium succinate

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម ៖

      - អាការៈប្រតិកម្មធ្ងន់ធ្ងរដោយសារការហូរឈាមច្រើន(Hemorrhagic shock)ឬដោយសារការឆ្លងមេរោគ(Septic shock)

      - ទប់ស្កាត់សកម្មភាពនៃប្រព័ន្ធភាពស៊ាំនៅក្នុងការវះកាត់ផ្លាស់ប្ដូរតម្រងនោម

      - កាត់បន្ថយផលប៉ះពាល់លើមុខងារប្រព័ន្ធសរសៃប្រសាទចំពោះអ្នកជំងឺដែលទទួលរងការប៉ះទង្គិចលើខួរឆ្អឹង(ក្នុងអំឡុងពេល8ម៉ោងក្រោយការប៉ះទង្គិច)

      - ជំងឺតម្រងនោមNephrotic syndrome

      - ជំងឺរឹងនៅតាមសរសៃប្រសាទដោយសារខូចជាលិកាព័ទ្ធជុំវិញសរសៃប្រសាទ(Multiple sclerosis)

      - ជំងឺប្រភេទរូម៉ាទីស(Rheumatism)ដែលពិបាកព្យាបាល (ជំងឺអេរីតេម៉ាតូស(Lupus erythematosus) ជំងឺរលាកសរសៃឈាមពេញរាងកាយ ជំងឺរលាកសាច់ដុំច្រើនកន្លែង ជំងឺស្បែកក្រិន ជំងឺរលាកសាច់ដុំនិងស្បែក។ល។)

      - ជំងឺហឺត (Bronchial asthma)

      - ជំងឺមហារីកកោសិកានៃប្រព័ន្ធទឹករងៃ(Malignant lymphoma)ដែលរើឡើងវិញឬពិបាកព្យាបាល (ប្រើរួមជាមួយឱសថប្រឆាំងមហារីកផ្សេងទៀត)។

    • កម្រិតប្រើប្រាស់

      ថ្នាំចាក់:
      ・ករណីប្រើចំពោះអាការៈប្រតិកម្មធ្ងន់ធ្ងរដោយសារការហូរឈាមច្រើន(Hemorrhagic shock)ឬដោយសារការឆ្លងមេរោគ(Septic shock):
      - អាការៈប្រតិកម្មធ្ងន់ធ្ងរដោយសារការហូរឈាមច្រើន(Hemorrhagic shock): ជាទូទៅ ប្រើក្នុងកម្រិត1ដង 125~2000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ ប្រសិនបើរោគសញ្ញាមិនល្អប្រសើរឡើងទេ អាចប្រើបន្ថែមទៀត។
      - អាការៈប្រតិកម្មធ្ងន់ធ្ងរដោយសារការឆ្លងមេរោគ(Septic shock): ជាទូទៅ ប្រើក្នុងកម្រិត1ដង 1000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ ប្រសិនបើរោគសញ្ញាមិនល្អប្រសើរឡើងទេ អាចប្រើ 1000mg បន្ថែមទៀត។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។
      ・ករណីប្រើនៅក្នុងការទប់ស្កាត់សកម្មភាពនៃប្រព័ន្ធភាពស៊ាំនៅក្នុងការវះកាត់ផ្លាស់ប្ដូរតម្រងនោម:
      ជាទូទៅ ប្រើក្នុងកម្រិត1ថ្ងៃ 40~1000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។
      ・ករណីប្រើនៅក្នុងការកាត់បន្ថយផលប៉ះពាល់លើមុខងារប្រព័ន្ធសរសៃប្រសាទចំពោះអ្នកជំងឺដែលទទួលរងការប៉ះទង្គិចលើខួរឆ្អឹង(ក្នុងអំឡុងពេល8ម៉ោងក្រោយការប៉ះទង្គិច):
      ជាទូទៅ ក្នុងអំឡុងពេល8ម៉ោងក្រោយការប៉ះទង្គិច ប្រើឱសថនេះក្នុងកម្រិត30mg/kg(Methylprednisolone) ដោយព្យួរសេរ៉ូមតាមសរសៃវ៉ែនរយៈពេល15នាទី រួចផ្អាកការប្រើឱសថនេះរយៈពេល45នាទី។ បន្ទាប់ពីនោះ ប្រើឱសថនេះក្នុងកម្រិត5.4mg/kg/ម៉ោង ដោយព្យួរសេរ៉ូមតាមសរសៃវ៉ែនរយៈពេល23ម៉ោង។
      ・ករណីប្រើចំពោះជំងឺតម្រងនោមNephrotic syndrome:
      - មនុស្សពេញវ័យ: ប្រើក្នុងកម្រិត1ថ្ងៃ 500~1000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។
      - កុមារ: ប្រើក្នុងកម្រិត1ថ្ងៃ 30mg(Methylprednisolone)/kg (កម្រិតប្រើអតិបរមា1000mg) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។
      ・ករណីប្រើចំពោះជំងឺរឹងនៅតាមសរសៃប្រសាទដោយសារខូចជាលិកាព័ទ្ធជុំវិញសរសៃប្រសាទ(Multiple sclerosis):
      មនុស្សពេញវ័យ: ប្រើក្នុងកម្រិត1ថ្ងៃ 500~1000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។
      ・ករណីប្រើចំពោះជំងឺប្រភេទរូម៉ាទីស(Rheumatism)ដែលពិបាកព្យាបាល (ជំងឺអេរីតេម៉ាតូស(Lupus erythematosus) ជំងឺរលាកសរសៃឈាមពេញរាងកាយ ជំងឺរលាកសាច់ដុំច្រើនកន្លែង ជំងឺស្បែកក្រិន ជំងឺរលាកសាច់ដុំនិងស្បែក។ល។):
      - មនុស្សពេញវ័យ: ប្រើក្នុងកម្រិត1ថ្ងៃ 500~1000mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។
      - កុមារ: ប្រើក្នុងកម្រិត1ថ្ងៃ 30mg(Methylprednisolone)/kg ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ អាចបង្កើនឬបន្ថយកម្រិតប្រើប្រាស់ទៅតាមរោគសញ្ញានិងប្រតិកម្មរបស់អ្នកជំងឺ ប៉ុន្តែ កម្រិតអតិបរមាប្រើក្នុង1ថ្ងៃគឺ 1000mg។
      ・ករណីប្រើចំពោះជំងឺហឺត (Bronchial asthma):
      - មនុស្សពេញវ័យ: នៅលើកដំបូង ប្រើក្នុងកម្រិត 40~125mg(Methylprednisolone) ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ បន្ទាប់ពីនោះ បន្ថែមកម្រិត 40~80mg(Methylprednisolone)ដោយយឺតៗទៅតាមរោគសញ្ញា រៀងរាល់4~6ម៉ោង។
      - កុមារ: នៅលើកដំបូង ប្រើក្នុងកម្រិត 1.0~1.5mg(Methylprednisolone)/kg ចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ បន្ទាប់ពីនោះ បន្ថែមកម្រិត 1.0~1.5mg(Methylprednisolone)/kgដោយយឺតៗទៅតាមរោគសញ្ញា រៀងរាល់4~6ម៉ោង។
      ・ករណីប្រើចំពោះជំងឺមហារីកកោសិកានៃប្រព័ន្ធទឹករងៃ(Malignant lymphoma)ដែលរើឡើងវិញឬពិបាកព្យាបាល (ប្រើរួមជាមួយឱសថប្រឆាំងមហារីកផ្សេងទៀត):
      ជាទូទៅ ប្រើក្នុងកម្រិត1ថ្ងៃ1ដង 250~500mg រយៈពេល5ថ្ងៃ ដោយចាក់តាមសរសៃវ៉ែនដោយយឺតៗឬព្យួរសេរ៉ូមតាមសរសៃវ៉ែន។ ចាត់ទុកជា1វដ្ត ដោយអនុវត្តបែបនេះរៀងរាល់3~4សប្ដាហ៍។ ត្រូវប្រើឱសថនេះរួមជាមួយឱសថប្រឆាំងមហារីកផ្សេងទៀត។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

      ・មិនត្រូវប្រើរួមជាមួយវ៉ាក់សាំងរស់(Live vaccine)ឬវ៉ាក់សាំងខ្សោយ(Attenuated vaccine)នោះទេ - ឱសថនេះធ្វើអោយប្រព័ន្ធភាពស៊ាំថយចុះ ដូចនេះ អ្នកជំងឺអាចនឹងមិនអាចទប់ទល់នឹងមេរោគដែលមិនទាន់ងាប់នៅក្នុងវ៉ាក់សាំងប្រភេទនេះបានទេ។

      ជាគោលការណ៍ អ្នកជំងឺដូចខាងក្រោមមិនត្រូវប្រើប្រាស់ឱសថនេះទេ។ ករណីចាំបាច់ត្រូវប្រើ ត្រូវតាមដានស្ថានភាពជំងឺនិងផលរំខានឱសថអោយបានដិតដល់ ៖

      1. អ្នកដែលកំពុងមានជំងឺឆ្លងដែលមិនទាន់រកឃើញវិធីព្យាបាលដែលមានប្រសិទ្ធិភាពនៅឡើយ ឬ អ្នកដែលកំពុងមានជំងឺផ្សិតពេញរាងកាយ។

      2. អ្នកដែលកំពុងមានជំងឺឆ្លងធ្ងន់ធ្ងរនិងមានមុខងារតម្រងនោមចុះខ្សោយឬមានជំងឺខ្សោយតម្រងនោមរ៉ាំរ៉ៃ។

      3. អ្នកដែលកើតមានជំងឺស្ទះសរសៃឈាមក្នុងបេះដូងលក្ខណៈស្រួចស្រាវ។

    • ផលរំខាន

      ផលរំខានរួមមាន សម្ពាធឈាមធ្លាក់ចុះឬកើនឡើង ជាតិស្ករក្នុងឈាមកើនឡើង ងាយកើតជំងឺឆ្លង របួសក្រជា។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ពិបាកដកដង្ហើម ក្រហមពេញខ្លួន ហើមត្របកភ្នែក បបូរមាត់និងអណ្ដាត (Shock)

      - ឈឺទ្រូង ចង្វាក់បេះដូងខុសប្រក្រតី (ប៉ះពាល់មុខងារបេះដូង)

      - ក្ដៅខ្លួន អាការៈស្រដៀងផ្ដាសាយ (ជំងឺឆ្លងបណ្ដាលមកពីវីរុស បាក់តេរី មេរោគផ្សិត។ល។)

      - ឈឺនៅផ្នែកចង្កេះនិងខ្នង ឈឺសន្លាក់នៅគល់ភ្លៅ សាច់ដុំរឹងនិងស្ពឹក (ជំងឺពុកឆ្អឹង ជំងឺខូចក្បាលឆ្អឹងនៃឆ្អឹងដើមដៃនិងឆ្អឹងភ្លៅ)

      - ចង់ក្អួត លាមកមានពណ៌ខ្មៅ ឈឺពោះ (ហូរឈាមនៅតាមបំពង់រំលាយអាហារ ធ្លាយក្រពះឬពោះវៀន ដំបៅក្រពះឬពោះវៀន ជាដើម)

      - ឈឺសាច់ដុំ អស់កម្លាំង (ជំងឺទាក់ទងនឹងសាច់ដុំ)

      - ហើមនិងឈឺជើង ដង្ហក់ ឈឺទ្រូងនិងក្បាល (ជំងឺកំណកឈាម(Thrombosis))

      - សាច់ដុំកន្ត្រាក់ឬប្រកាច់ (សម្ពាធក្នុងក្បាលកើនឡើង)

      - អារម្មណ៍ធ្លាក់ទឹកចិត្ត ស្មារតីមិននឹងនរ (ជំងឺផ្នែកស្មារតី)

      - ស្ងួតក ផឹកទឹកច្រើន នោមច្រើន (ជំងឺទឹកនោមផ្អែម)

      - ស្រវាំងភ្នែក ទំហំនៃគំហើញរួមតូច (ជំងឺក្លូកូម(Glaucoma) ជំងឺភ្នែកឡើងបាយប្រភេទPosterior capsular cataract ជាដើម)

      - ឈឺផ្នែកខាងលើនៃពោះ ឈឺផ្នែកចង្កេះនិងខ្នង ក្ដៅខ្លួន (រលាកលំពែង)

      - ហើមខ្លួន ពិបាកដកដង្ហើម ឆាប់ហត់ (ជំងឺខ្សោយបេះដូងប្រភេទCongestive heart failure)

      - ឈឺកំភួនជើង (ដាច់សរសៃសាច់ដុំ(Tendon rupture))

      - ស្នាមក្រហមឬពណ៌ស្វាយឬពណ៌ផ្កាឈូកនៅលើម្រាមជើងឬជើង (ជំងឺKaposi's sarcoma)

      - អស់កម្លាំង ភ្នែកនិងស្បែកប្រែពណ៌លឿង (ប៉ះពាល់មុខងារថ្លើម ខាន់លឿង)។

    • អន្តរប្រតិកម្ម

      ・វ៉ាក់សាំងរស់(Live vaccine)ឬវ៉ាក់សាំងខ្សោយ(Attenuated vaccine) - ឱសថនេះធ្វើអោយប្រព័ន្ធភាពស៊ាំថយចុះ ដូចនេះ អ្នកជំងឺអាចនឹងមិនអាចទប់ទល់នឹងមេរោគដែលមិនទាន់ងាប់នៅក្នុងវ៉ាក់សាំងប្រភេទនេះបានទេ។ ដូច្នេះ ហាមប្រើរួមគ្នា។

      ឱសថខាងក្រោមនេះ អាចប្រើរួមជាមួយឱសថនេះបាន ប៉ុន្តែត្រូវតាមដានស្ថានភាពជំងឺនិងផលរំខានអោយបានដិតដល់។

      ・ឱសថCiclosporin - អាចធ្វើអោយកំហាប់ក្នុងឈាមនៃឱសថទាំងពីរកើនឡើងឬធ្វើអោយកើតមានអាការៈប្រកាច់។

      ・ឱសថErythromycin, Itraconazole, Miconazole, Quinupristin, Dalfopristin, Estrogen, Aprepitant - អាចធ្វើអោយសកម្មភាពនៃMethylprednisolone sodium succinateកើនឡើង។

      ・ឱសថប្រឆាំងកំណកឈាម (Parnaparin sodium, Warfarinជាដើម) - អាចធ្វើអោយប្រសិទ្ធិភាពប្រឆាំងកំណកឈាមនៃឱសថទាំងនេះប្រែប្រួល។

      ・ឱសថVecuronium bromide, Pancuronium bromide - អាចធ្វើអោយប្រសិទ្ធិភាពនៃឱសថទាំងនេះប្រែប្រួល។

      ・ឱសថបំបាត់ការឈឺចាប់និងបញ្ចុះកម្ដៅប្រភេទNSAIDs(Sasapyrine, Diclofenacជាដើម) - អាចធ្វើអោយផលរំខានចំពោះសរីរាង្គរំលាយអាហារងាយកើតឡើង។

      ・ឱសថបញ្ចុះទឹកនោមប្រភេទបញ្ចេញប៉ូតាស្យូម(Trichlormethiazide, Hydrochlorothiazide, Furosemideជាដើម) - អាចធ្វើអោយកម្រិតប៉ូតាស្យូមក្នុងឈាមធ្លាក់ចុះ។

      ・ឱសថDigoxin - អាចធ្វើអោយផលរំខាននៃDigoxinកើតឡើង។

      ・ឱសថប្រភេទSalicylic acid (Sasapyrine, Aspririn ជាដើម) - អាចធ្វើអោយផលរំខាននៃឱសថទាំងនេះកើតឡើង។

      ・ឱសថPhenobarbital, Phenytoin, Rifampicin, Carbamazepine - អាចធ្វើអោយប្រសិទ្ធិភាពនៃMethylprednisolone sodium succinateថយចុះ។

      ・ឱសថព្យាបាលជំងឺទឹកនោមផ្អែម ថ្នាំចាក់អាំងស៊ុយលីន - អាចធ្វើអោយសកម្មភាពបញ្ចុះជាតិស្ករក្នុងឈាមនៃឱសថទាំងនេះថយចុះ។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・នៅក្នុងការប្រើឱសថនេះ ត្រូវប្រុងប្រយ័ត្នជាពិសេសចំពោះការកើតឡើងនៃជំងឺអុតស្វាយឬកញ្ច្រិល ព្រោះវាអាចបណ្ដាលអោយមានគ្រោះថ្នាក់ដល់ជីវិតរបស់អ្នកជំងឺ។

      ・គួរចៀសវាងការប្រើឱសថនេះក្នុងកម្រិតខ្ពស់ចំពោះអ្នកជំងឺដែលមានអាការៈប្រតិកម្មធ្ងន់ធ្ងរដោយសារការឆ្លងមេរោគ(Septic shock) ព្រោះវាអាចបណ្ដាលអោយមានគ្រោះថ្នាក់ដល់ជីវិតរបស់អ្នកជំងឺ។

    • សកម្មភាពឱសថ

      ឱសថនេះមានសកម្មភាពដូចទៅនឹងអរម៉ូនAdrenocortical hormonesនៅក្នុងរាងកាយ ដោយមានប្រសិទ្ធិភាពទប់ស្កាត់អាការៈរលាក អាការៈប្រតិកម្ម។ល។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp