Pamidronate disodium hydrate = Pamidronic acid

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - រោគសញ្ញានៃការកើនឡើងកម្រិតកាល់ស្យូមខ្ពស់នៅក្នុងឈាមដោយសារជំងឺមហារីក។

      - ការរីករាលដាលនៃជំងឺមហារីកសុដន់ទៅឆ្អឹងលក្ខណៈរលាយកោសិកាឆ្អឹង (ប្រើរួមជាមួយការព្យាបាលដោយគីមី ការព្យាបាលដោយអរម៉ូន ឬ ការព្យាបាលដោយវិទ្យុសកម្ម)

      - ជំងឺខ្សោយការផលិតឆ្អឹង(Osteogenesis imperfecta)។

    • កម្រិតប្រើប្រាស់

      ថ្នាំចាក់:

      ・រោគសញ្ញានៃការកើនឡើងកម្រិតកាល់ស្យូមខ្ពស់នៅក្នុងឈាមដោយសារជំងឺមហារីក:

      មនុស្សពេញវ័យ:ប្រើតែ1ដងក្នុងកម្រិត30~45mg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់4ម៉ោង។ ទុកគម្លាតយ៉ាងហោចណាស់1សប្ដាហ៍ ដើម្បីតាមដានប្រសិទ្ធិភាពឱសថ មុននឹងសម្រេចថាចាំបាច់ត្រូវប្រើឱសថនេះម្ដងទៀត។

      ・ការរីករាលដាលនៃជំងឺមហារីកសុដន់ទៅឆ្អឹងលក្ខណៈរលាយកោសិកាឆ្អឹង:

      មនុស្សពេញវ័យ:ប្រើ1ដង90mg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់4ម៉ោង។ បន្តប្រើឱសថនេះរៀងរាល់4សប្ដាហ៍។

      ・ជំងឺខ្សោយការផលិតឆ្អឹង(Osteogenesis imperfecta):

      - កុមារអាយុក្រោម2ឆ្នាំ:ប្រើ1ថ្ងៃ1ដង0.5mg/kg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់4ម៉ោង។ បន្តប្រើឱសថនេះរយៈពេល3ថ្ងៃជាប់ៗគ្នា និង ទុកគម្លាតរយៈពេល2ខែមុននឹងចាប់ផ្ដើមប្រើសារជាថ្មីម្ដងទៀត។ កម្រិតអតិបរមាប្រើក្នុង1ថ្ងៃគឺ60mg។

      - កុមារអាយុ2ឆ្នាំ~ក្រោម3ឆ្នាំ:ប្រើ1ថ្ងៃ1ដង0.75mg/kg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់4ម៉ោង។ បន្តប្រើឱសថនេះរយៈពេល3ថ្ងៃជាប់ៗគ្នា និង ទុកគម្លាតរយៈពេល3ខែមុននឹងចាប់ផ្ដើមប្រើសារជាថ្មីម្ដងទៀត។ កម្រិតអតិបរមាប្រើក្នុង1ថ្ងៃគឺ60mg។

      - កុមារអាយុ3ឆ្នាំឡើងទៅ:ប្រើ1ថ្ងៃ1ដង1.0mg/kg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់4ម៉ោង។ បន្តប្រើឱសថនេះរយៈពេល3ថ្ងៃជាប់ៗគ្នា និង ទុកគម្លាតរយៈពេល4ខែមុននឹងចាប់ផ្ដើមប្រើសារជាថ្មីម្ដងទៀត។ កម្រិតអតិបរមាប្រើក្នុង1ថ្ងៃគឺ60mg។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថBisphosphonateផ្សេងទៀត។

    • ផលរំខាន

      ផលរំខានរួមមាន អាការៈខ្វះឈាម ក្ដៅខ្លួន ឈឺសន្លាក់ ឈឺសាច់ដុំ ឡើងកន្ទួលក្រហម រមាស់ ឈឺក្បាល វិលមុខ ងងុយគេង ការប្រែប្រួលកម្រិតម៉ាញ៉េស្យូម ប៉ូតាស្យូម ផូស្វ័រជាដើមក្នុងឈាម ។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ដង្ហក់ ពិបាកដកដង្ហើម ដកដង្ហើមលឺសម្លេងខុសប្រក្រតី (រោគប្រតិកម្មធ្ងន់ធ្ងរ)

      - បរិមាណទឹកនោមថយចុះ ខ្សត់ទឹកនោម ក្ដៅខ្លួន (មុខងារតម្រងនោមចុះខ្សោយ ជំងឺតម្រងនោមNephrotic syndrome ជំងឺរលាកតម្រងនោមប្រភេទInterstitial nephritis)

      - គ្មានកម្លាំងនៅសាច់ដុំ សាច់ដុំរួមស្វិត ស្ពឹកម្រាមដៃ (រោគសញ្ញានៃកម្រិតកាល់ស្យូមក្នុងឈាមធ្លាក់ចុះទាប)

      - ឈឺចង្កា ធ្មេញរង្គើ ហើមអញ្ចាញធ្មេញ (ជំងឺខូចឆ្អឹងចង្កា រលាកឆ្អឹងចង្កា)

      - រលាកនៅត្រចៀកផ្នែកខាងក្រៅ មានទឹករងៃហូរចេញពីត្រចៀក ឈឺត្រចៀក (ជំងឺខូចឆ្អឹងរន្ធត្រចៀក)

      - ឈឺនៅភ្លៅឬគល់ភ្លៅ (បាក់ឆ្អឹងឬប្រេះឆ្អឹងភ្លៅ)

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថប្រភេទCalcitonin - អាចធ្វើអោយកម្រិតកាល់ស្យូមនៅក្នុងឈាមកើនឡើងខ្ពស់ភ្លាមៗ។

      ・ឱសថCinacalcet - អាចធ្វើអោយកម្រិតកាល់ស្យូមនៅក្នុងឈាមធ្លាក់ចុះ។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・មុនចាប់ផ្ដើមប្រើប្រាស់ឱសថនេះ អ្នកជំងឺគួរទទួលការពិនិត្យមាត់ធ្មេញ ហើយប្រសិនបើមានបញ្ហាមាត់ធ្មេញដែលត្រូវការដកធ្មេញឬវះកាត់ អ្នកជំងឺគួរធ្វើការព្យាបាលមាត់ធ្មេញចប់រួចរាល់ជាមុនសិន ព្រោះការដកធ្មេញជាដើមអាចធ្វើអោយផលរំខាននៃឱសថនេះរប៉ះពាល់ដល់ចង្កាងាយនឹងកើតឡើង។ ម្យ៉ាងទៀត អ្នកជំងឺគួររក្សាអនាម័យមាត់ធ្មេញជានិច្ច ព្រមទាំងទទួលការពិនិត្យសុខភាពមាត់ធ្មេញអោយបានទៀងទាត់។

      ・ឱសថនេះរអាចផ្ដល់រំខានជាអាការៈងងុយគេង វិលមុខ ជាដើម ដូច្នេះ គួរចៀសវាងការបើកបរឬបញ្ជាម៉ាស៊ីនដែលមានគ្រោះថ្នាក់ ក្នុងអំឡុងពេលប្រើប្រាស់ឱសថនេះ។

    • សកម្មភាពឱសថ

      នៅក្នុងឆ្អឹងមានកោសិកា2ប្រភេទ គឺកោសិកាបំបែកឆ្អឹង និង កោសិកាផលិតឆ្អឹង។ សកម្មភាពនៃឱសថនេះនៅមិនទាន់មានទ្រឹស្ដីច្បាស់លាស់នៅឡើយទេ ប៉ុន្តែ មានការស្រាវជ្រាវបង្ហាញថា ឱសថនេះមានប្រសិទ្ធិភាពបង្អាក់ដំណើរការនៃវដ្ដអាស៊ីតមេវ៉ាឡូនិច(Mevalonate pathway)និងប្រតិកម្មផ្សេងៗទៀតនៅក្នុងកោសិកាបំបែកឆ្អឹង ធ្វើអោយកោសិកានេះមិនអាចធ្វើសកម្មភាពរំលាយឆ្អឹងបាន។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp